Om Hardanger Sunnhordlandske Bytering

Hardanger Sunnhordlandske Bytering

Kva er ein bytering?
Ein bytering er ei lokal informasjonsteneste der folk kan gi og få tilbod om varer og tenester. Byteringane er lokale, uavhengige, ikkje-kommersielle organisasjonar som kan startast og drivast til lave kostnader, av kven som helst i lokalsamfunnet. Medlemane betaler for varene og tenestene med eigne varer og tenester, ved at byteringen formidlar transaksjonar i ei lokal verdieining mellom medlemane.

Det internasjonale namnet på bytering er LETS (Local Employment and Trading System).

Kvifor bytering?

Alle lokalsamfunn inneheld mange evner og ressursar. Gjennom ein bytering kan desse bli synlege og tilgjengelege for folk utanom familien og nære vener.
Byteringen kan styrka din personlege økonomi ved at ting blir bytt og dermed blir til nytte for fleire. Dessutan får du adgang til tenester som elles ville ha kosta pengar.
I ein bytering kan du vera med på å styrka nærmiljøet ditt ved at me hjelper kvarandre praktisk. Det aukar den sosiale kontakten mellom naboane.
Du kan bruka byteringen til å halda ved like eller utvikla eit handverk. Slik kan du etterkvart skaffa deg sjølv eit arbeid.
Du kan driva med noko du likar og som samstundes er til nytte og glede for andre.

Fordelen med ein bytering er at den som vil ha noko av deg ikkje absolutt må gi deg noko attende. Dette er den store forskjellen mellom ein bytering og ein "vanleg" bytehandel eller dugnad. I staden for å skylda enkeltpersonar ei teneste, skyldar du fellesskapen ein teneste. Då vert det lettare å finna noko du kan gi attende.

Korleis fungerer det?
Kvar medlem får ein konto i byteringen. Medlemane registrerer sjølv tilboda og etterspurnadane sine på byteringen si oppslagstavle, slik at desse blir tilgjengelege for alle medlemane. Når du finn noko interessant, tek du kontakt med den som tilbyr/etterspør. Blir det handel, registrerer kjøparen at ein handel er inngått. Det avtalte beløpet overførast så frå kjøparen til seljaren sin konto. I motsetnad til ein vanleg konto er det høgst lovleg å overtrekka ein byteringkonto.

(Reglane for skatteplikt er dei same om ein betaler med "lokal valuta" eller norske kroner.)

Hardanger Sunnhordlandske Bytering
Hardanger Sunnhordlandske Bytering vart oppretta hausten 2004. Nettsidene er utvikla av Robert Sjursen i Bergen Byttering, og omarbeidd for hardangerske forhold av Vevkjerringa Rama.

Valutaeininga har me valt å kalla takk; 1 takk tilsvarer 1 krone, slik at det skal vera lett å fastsetja verdien på varer/ tenester. Det kostar 50 kroner i året å vera med , og ved innmeldinga vert saldoen sett til 1000 takk (fordi nokon må starta med å kjøpa, og vi forhindrar slik at nokon må starta med negativ saldo).

Innafor byteringen kan ein ha mindre, lokale ringar, det kan vera t.d. ei bygd, eit borettslag, ein venekrins, ein skule, ein arbeidsplass eller anna. Desse mindre ringane vert definerte av medlemane sjølve. Ein handlar mest innanfor lokalringen, men alle medlemane kan handla med alle i heile Hardanger Sunnhordlandske Bytering.

Andre byteringar med nettsider:

Framtiden i våre hender formidlar elles kontakt til ei rekkje byteringar rundt om i landet. Ei oversikt over desse finst på www.fivh.no/index.php?artikkelid=621